Fa’aora, teie te i’oa ‘ia ‘i hōro’ahia nō teie pereo’o. Rāve’a autaea’era’a fa’ata’ahia nō te ha’afātata ‘e nō te fa’a’ōhie ‘i te mau ‘aitauira’a mana’o ‘i rotopū ‘i te mau rave ‘ohipa ‘e te mau ta’ata ‘e noho ra ‘i roto ‘i te mau fare tōtiare ‘e vai ra ‘i roto ‘i te mau ‘oire nō Tahiti nei.
Maha rave ‘ohipa ‘i roto ‘i teie pereo’o, nō te pāhono ‘i te mau anira’a rū nō roto mai ‘i te huira’atira, ‘e nō te fa’a’ōhie ato’a ‘i te tuha’a nō te ‘aufaura’a.
‘Ua tāpapa atu te fa’atere hau nō te autaea’era’a ‘e nō te nohora’a ‘o Minarii Chantal Galenon nō te rave ‘i te ‘ōroa ‘āvarira’a, ‘i tōna reo : « ‘e pereo’o teie ‘i fa’anahohia nō te tauturu ‘i te huira’atira, ha’afātata roa ‘i roto ‘i te mau aroa nō te fārerei tino roa ‘i te mau ta’ata ‘e ora ra ‘i roto ‘i te mau fare tōtiare, nō te tāu’aparau ‘i te fifi ‘e fārereihia ra ‘e rātou, ‘aore ra nō te tāu’aparau i tō rātou orara’a hau ‘i roto ‘i teie mau fare« .
Nō te mau ta’ata ‘e ora ra ‘i roto ‘i teie mau fare tōtiare, ‘e mea faufa’a roa teie pereo’o. ‘I te reo ‘o te Peretetini nō te tā’atira’a Hauts des Vallons : « ‘e ‘ere nā te ta’ata fa’ahou ‘e haere ‘i te pū OPH, nā teie ra pū ‘e haere mai ‘e fārerei ‘i te ta’ata, te nu’u ra ia tātou ‘i mua« .
‘E fa’a’ohipahia teie pereo’o « Truck Fa’aora » ‘e toru taime ‘i te hepetoma nā roto ‘i te mau ‘oire, ‘e ha’amata ‘i teie ihoa ‘āva’e nō tetepa nei.
