E tarēna ‘ohipa ha’api’ira’a i tupu ai teie nei fārereira’a. I te ‘āva’e nō tētepa, ‘ua rave teie nei mau tamari’i i te mau mā’imira’a i ni’a i te tōro’a ta’ata hīmene. Tano maita’i inaha i taua taime ra, ‘ua pāpū e tae mai ‘o Francis Cabrel i Tahiti nei i te ‘āva’e ‘ātopa. A ta’a noa atu i te parau o teie nei rohipehe, ‘ua ha’api’i ato’a te mau tamari’i i tāna mau hīmene.
Mea nā reira te putara’a mai te mana’o e huri hō’ē tūha’a o te hīmene « Je l’aime à mourir ». I teie nei mahana pae, ‘ua fa’aoto atu te mau tamari’i i te hīmene i mua ‘ia Francis Cabrel i ni’a i te tītaura’a a te peretiteni Moetai Brotherson, i te pū fa’aterera’a hau fenua.
« ‘Ua au roa vau », i te reo ‘o Francis Cabrel, « mea navenave i te tari’a. ‘Ua tano roa vau i te pāpa’ira’a i teie hīmene. ‘Ua maere au ‘e mea nehenehe roa. ‘Aita ra vau e mana’o ra e mara’a ia’u i te hīmene i te reira. »
Mea mau te mau hīmene a Francis Cabrel ‘ia Moetai Brotherson. Te ‘oa’oa nei te peretiteni i te ‘ohipa i ravehia mai e te mau tamari’i. « ‘Aita atu ‘ohipa fa’ahiahia roa a’e i te ha’api’ira’a i tō tātou reo maoti te fa’a’ohipara’a i te mau hīmene a Francis Cabrel ? Mea nehenehe roa. E tano e nā reira fa’ahou ». ‘Ua hīmene ato’a te peretiteni « Petite Marie » ‘e ‘o Francis Cabrel.
‘Aita e nehenehe e parau i te ‘oa’oa o te mau tamari’i i te fārereira’a i te ta’ata hīmene ra. « I te ha’amatara’a ‘ua huru ‘ē ri’i mātou. I teie nei ra, ua topa te hau », i te reo hō’ē ‘o rātou.
