Matahiti 2018 tō Aurélien Planchais Godefroy rirora’a mai ‘ei referi nā te FIFA, mai tāua matahiti ra ‘oia i te ti’ara’a mai ‘ei ta’ata hio i roto ‘i te mau ha’utira’a rahi. I teie matahiti, ‘ua tāpe’a-fa’ahou-hia ‘ona ‘ei referi i roto i te harura’a ‘āu’a nō te ao o te tupu i te fenua Tetēria mai te mahana mātāmua ‘e tae atu i te 11 nō mē.
Mai te hepetoma i ma’iri a’e nei, tei roto ‘o Aurélien ‘e 10 mau referi nō te mau ‘āmuitahira’a nō te ao i te fa’aineinera’a. Ia au tā rātou tāpura ‘ohipa, i te mau po’ipo’i ato’a, tei ni’a rātou i te tahua tu’era’a pōpō nō te horohoro ‘e nō te fa’a’eta’eta i te tino. « Mea tupu maita’i teie fa’aineinera’a, mai te mātauhia. Tītauhia ihoa e rave fa’ahou teie mau ha’api’ipi’ira’a, te tumu, ‘aita teie mau ha’api’ipi’ira’a e rave-tāmau-hia, ‘aita i rahi te mau ha’utira’a a te OFC. I teie ra matahiti, ‘ua peahia vau, i te mea, ‘ua tītau te FIFA ia’u i roto i te tīti’ara’a a te mau pupu tu’e pōpō nō te tuha’a ‘Europa. A toru taime i teie nei, tō’u ti’ara’a mai i roto i teie tata’ura’a, e mea au roa nā’u. E fārerei fa’ahou i tō’u mau hoa referi ‘e i te pae tino, mea naho maita’i tā mātou mau ha’atū’aro », i te reo ‘oa’oa ‘o Aurélien Planchais-Godefroy, referi a te FIFA, i roto hō’ē o tāna mau fa’aineinera’a.
Te tahi ato’a fā o teie fa’aineinera’a, ‘oia ho’i, ia hō’ē te fa’aotira’a a te mau referi i ni’a i te tahua tu’era’a pōpō. Mai ia Aurélien, e ti’a atu teie mau referi i ni’a i te one nō te fenua Seychelles i teie mahana maha nō te mau fārereira’a mātāmua a te harura’a ‘āua nō te ao. Mau ha’uti tā ‘outou e fāna’o ato’a i ni’a i tā tātou nei ‘āfata teata TNTV. Ha’apūrorora’a ti’a, rautīhia e Olivier Huc. Te ha’utira’a mātāmua a te pupu Tiki Toa te tupu i teie mahana pae, 15 minuti ma’iri i te hora 2 i te ‘ā’ahiata. E fārerei atu tō tātou mau ‘aito i te feiā ha’uti nō Tīreni.
