TNTV: Te ‘ite hia ra i te mau matahiti ato’a, ia tae ana’e i terā ‘āva’e ‘ēperēra, ua rahi roa te tū’arora’a i te fenua tahiti nei. Te vai ra te ‘ōpuara’a i roto ia ‘outou, tūra’i tā ‘outou fa’anahora’a?
Ma ZINGUERLET: ‘Oia ‘a tau matahiti teie nei tō mātou hi’o noa ra’a i tā mātou nei mau ‘ōpuara’a. ‘E ‘e titotito ri’i i ni’a i te mau ‘ōpuara’a ‘a tetahi mau ‘āmuitahira’a. ‘O tā mātou ato’a ia i mana’o, nehenehe teie matahiti ‘i muri nei, ‘e tūra’i hia atu tā mātou nei mau ‘ōpuara’a, teie ihoā ra « Challenge de Polynésie », ‘e tūra’i ri’i hia ‘ōna i roto i te ‘āva’e tiunu, tiurai anei. ‘E ‘ōpuara’a teie…
TNTV: Nō tera mea ‘e pou mai terā mau pupu e haere i’ō nō te tu’era’a pōpō ia oti, tū’ati mai ia ‘outou te pae o te pā’ira’a pōpō? ‘Aore ra, te vāhi nō te fa’ari’ira’a, te mau pūhapara’a no te fa’ari’ira’a terā mau pupu?
Ma ZINGUERLET: Te fārerei nei mātou pauroa te mau matahiti tetahi mau fifi, e fifi hoa ra i te pae’au nō te pūhapara’a, te pae ‘o te utara’a ato’a, e mai te peu, e vaiho noa tātou i teie mau ‘ōpuara’a tā te mau ‘āmuitahira’a e tu’u nei i te ‘āva’e ‘ēperēra, i te fa’afa’a’eara’a ha’api’ira’a ‘inā hepetoma to’opiti ato’a. Mana’o ana’e au, e ‘ū’ana fa’ahou atu ā te fifi nō te mea, ua hina’aro tetahi mau pupu pā’ira’a pōpō ‘o te mau motu e tae ‘oi’oi mai. ‘Ua riro ‘enā te mau pūhapa nā pīha’i iho mai i teie nau piti fare tū’aro Fautau’a e JT. Nō te mea, te vai ato’a ra teie « Festival des îles » tā teie ‘āmuitahira’a tu’era’a pōpō, tā mātou ato’a e fa’atura nei. ‘Ua feruri ra mātou, mea au a’e, ia tura’i hia tā mātou i te ‘āva’e mē , tiunu mai te reira ri’i. ‘E vatavata ri’i mai paha ia te mau pūhapa nā pīha’i iho i teie mau fare tū’aro.
TNTV: Tūra’i ana’e ‘outou, te vai ato’a ra te ‘ōpuara’a. ‘E ha’amaita’i te fa’anahora’a, haere i ni’a i terā fa’anahora’a peho. Peho i roto i te faufa’a ‘o te hīro’a tumu anei, fa’atū’atira’a?
Ma ZINGUERLET: Mai te peu e fa’ari’i te mau pupu pā’ira’a pōpō e pou mai i roto i teie « Challenge de Polynésie » e fa’ari’i rātou e tūra’i, ‘e ha’amaita’i ihoa te ‘āmuitahira’a pā’ira’a pōpō te parau nō te nohora’a. Tetahi fā ‘o tā mātou ‘ōpuara’a i feruri nō teie « Challenge de Polynésie » teie matahiti i muri nei. Tetahi ia vāhi pūhapara’a nō te ta’ato’ara’a o te mau pupu o te mau motu, ia noho rātou hō’ē noa vāhi, ‘a tahi ia mana’o. ‘E te piti, ia nehenehe ato’a e ha’afaufa’a hia te parau nō te hīro’a tumu i roto i te vāhi nohora’a. ‘Ei hi’ora’a, mai te peu, te henua ‘enana mōnirē pō nāna e ‘īriti tetahi fa’a’itera’a. ‘Aita i ani hia hō’ē hora nō te fa’a’itera’a. Tetahi nau minuti. Nehenehe ‘e ‘ōpere nā ni’a i te mau pupu nō Raromata’i, Tuamotu ānei. Mahana piti pō, nā te mau pa’umotu, nā te mau pupu nō te tuamotu e hi’o mai tetahi fa’a’itera’a, tā rātou e hina’aro. Nā roto i te reo hīmene, nā roto i te ‘ori, te mau rāve’a e te mea ‘o tā rātou e hina’aro e fa’a’ite mai.
TNTV: Ma, ho’i mai tāua i ni’a i te teimaha, te ha’amāu’ara’a ‘o terā mau tere. Te ‘ite ra tāua i roto i terā tumu parau, nā ‘outou e amo te mau tīteti. Te vai ra te faufa’a ‘e ō mai i roto ia ‘outou? Te vai rā te mau rima tauturu roto ia ‘outou, nō te amo tera hōpoi’a?
Ma ZINGUERLET: ‘Ē, te vai rā te tauturu. Nā mua roa, te ha’amāuruuru nei au ‘i te hau fenua, tō tātou fa’aterehau nā mua roa, Nahema TEMARII, te pū IJSPF. Pauroa te mau matahiti e tauturu mai ihoa teie pū, nō te ha’amaita’ira’a e nō te fa’atupu hoa ra teie ‘ōpuara’a. Teie nei rā, ‘e’ita hoa e rava’i ‘i te mau matahiti ato’a. Nō te mea, te ani ato’a mai ra te mau pupu nō te mau motu hoa rā, te mau tauturu anei, te tīteti manureva ihoa rā. Teie matahiti, ua amo te ‘āmuitahira’a, 70% (hitu ‘ahuru i ni’a i te hānere) ‘o te ha’amāu’ara’a tīteti nō te mau pupu ato’a. Ia nehenehe rātou e pou mai i Tahiti nei, no teie « Challenge de Polynésie ». Tetahi terā tauturu i feruri hia. Ia nehenehe ā rātou e fa’aineine ia rātou i’ō ‘e nō te fa’a’ī maita’i tā rātou ‘āfata nō te pou mai. ‘Aufau ānei i tā rātou pūhapa, te mā’a…’e iti ri’i mai tā rātou mau ha’amāu’ara’a, nō te mea te vai ra teie tauturu. Ia feruri ana’e rā mātou, mea maita’i ‘e te ti’aturi nei au i teie mau matahiti i muri nei e tu’u fa’ahou mai te hau fenua tetahi mau rāve’a maita’i a’e.
TNTV: Te ‘ite ra tāua, ua pou mai te mau motu teie matahiti. ‘E ‘imi te rāve’a e haere mai e ti’i terā rē mātāmua. Nō te mea tō Tahiti terā ‘e ‘ite hia ra i ni’a i te ti’ara’a mātāmua i te pae o te mau tane e te mau vahine. ‘Eaha te poro’i hope’a i terā mau pupu hou ‘a ‘īriti ai teie mōnirē?
Ma ZINGUERLET: Te ti’aturi nei au, ‘e tupu maita’i teie ‘ōpuara’a ‘a tahi roa. ‘E te ha’apāpū ato’a nei au e, ‘aita te mau motu e pau mai, ha’avarevare. Haere mai hoa rātou ‘e aro i tō Tahiti. Tā’u ra ‘e tāparu rā ia tātou pā’āto’a, te mau pupu ‘e ō mai i roto i teie ‘ōpuara’a. ‘Ia tupu noa te Hau. Ha’uti mā, ‘e ‘e manuia hoa ia te manuia mai, te rē piti, te rē toru. Tā tātou ato’a ia e fa’ari’i.
