Mai te matahiti 2023, hō’ē ā pupu tei tae mātāmua i Ra’iātea, ‘e’ere rā hō’ē ā ‘āna’ira’a. Nō teie nei tuha’a mātāmua, 48 tiromētera i te ātea mai Huahine i Ra’iātea, te pupu OPT te ‘aito, ‘āpe’ehia mai e Air Tahiti ‘e Shell Va’a i te ti’ara’a 3.
3 hora 18 minuti te tāi’o uati a te pupu OPT. « E tāmata mātou i teie rēni ‘āfaro, tano maita’i te mau ‘are ‘e ‘ua ha’apa’ari fa’ahou mātou i te pae hope’a », i te reo ‘o Hitiroa Masingue, te pēperu o te pupu a te Fare rata. E riro ra, nō te piti o te tuha’a e tāui teie nei pupu i tāna feiā hoe.
I te tomora’a i Te ava rua, tē ‘ume’ume mai ra ‘o Team Air Tahiti ‘e ‘o Shell Va’a. Nō te pēperu o te pupu Air Tahiti Va’a, Hotuiterai Poroi, « mea pāpū, ‘ua hina’aro mātou e manuia i teie mahana. E tano e ha’apōpō maita’i ia Team OPT, poto roa te taime nō te tāpapa nā 150 mētera e fa’ata’a’ē nei ia mātou. E tāpe’a mātou i te pa’ari, e piti mahana ho’era’a e toe nei ».
« ‘Aita mātou i nane i te matara’a mai i te ava nō Huahine. Taera’a mai mātou i rōpū, ‘ua ha’amata mātou i te tūra’i. ‘Aita ato’a mātou i ‘ite ia OPT. ‘Aita i hope te hoera’a », i te mau ha’apāpūra’a a Charles Teinauri nō Shell Va’a.
Te tahi o te mau pupu tei mātara maita’i i roto i teie tuha’a mātāmua, te Team Huahine, te ti’ara’a maha tei roa’a ia na. ‘Ua mana’o tōna pēperu, Kevin Céran-Jérusalemy, e tupu te temeio : « ‘ua ti’aturi ato’a mātou e nehenehe paha hō’ē ‘ohipa i te tupu i teie nei mahana. Taera’a mai mātou i ni’a i terā rēni hōpe’a, e riro ‘ua mau paha mātou i roto i te ‘ōpape. Te haera’a mai terā nā va’a e 3 nā te pae ‘ātau, topa ri’i tō mātou mōrare, ‘aita ra e tāpe’a noa ā mātou ».
I te pae o te mau mātuatua, ‘ua ‘itehia te pūai ‘o Hinaraure’a. ‘O Nunu’e va’a ho’i tei mua roa i te ha’amatara’a mai. « Tō mātou fifi i teie nei mahana, ‘ua rohirohi roa tō mātou fa’ahoro ‘aita ā i tae atu ra i te ‘āfara’a. ‘Ōu’a atu ra te ta’ata ra, mea hoe 5 noa mai mātou 45 minuti paha. I te taera’a mātou i te ava, pa’i’uma fa’ahou mai nei ‘ona. Tāmata atu ra mātou e tāpapa i te rē 2, nō te mau tuha’a i mua », i te reo ‘o Manutea Owen, pēperu ‘o Nunu’e va’a.
Ananahi, mahana maha 31 nō ‘ātopa, e tupu ai te 2 o te tuha’a, mai Ra’iātea i Taha’a, 26 tiromētera i te ātea, ha’apūroro-ti’a-hia i ni’a ia TNTV mai te hora 8:30.
‘ĀNA’IRA’A :
Taure’a tamahine
1 EDT Va’a
Taure’a tāne
1 Team OPT
2 Tuaiva Nui
3 Mataiea Hoe
Piri’a vahine
1 Team Hawaii
2 Ka Lahui Kai
3 Teva
Mātuatua vahine
1 Ruahatu
2 Team Tamarii Mataiea
3 Nunue Va’a
Mātuatua tāne 40
1 Hinaraure’a
2 Tahitian Paddle
3 Nunu’e Va’a
Mātuatua tāne 50
1 Toa tai va’a
2 Mata are va’a
3 Te firi nape
Mātuatua tāne 60
1 Pirae Va’a
2 Nunue Va’a
3 Tahaa Nui
Va’a tā’ie
1 Team shine like sean
2 Tumara’a va’a
3 Tavake