Ti’ara’a 3 nō te hoera’a Huahine-Ra’iātea, ‘aita te pupu Shell va’a i ha’aparuparu. Te pupu 2 tei hoe mai ‘Uturoa i Patio, 27 tiromētera e fa’ata’a nei nā mata’eina’a e piti. ‘Ua fa’a’ite mai te mau mā’ona a Albert Moux ‘i tō rātou pūai. Hau atu, ‘o Team OPT ā tei te ti’ara’a mātāmua i te ‘āna’ira’a hōpe’a.
Nō te vitiviti o tā rātou pine, ‘ua tūpa’i, te mau taure’a fa’aineinehia e David Tepava, i te tai’o uāti 1:50:26 mauhia e EDT va’a mai te matahiti 2013 mai ā. « Inanahi nei, ‘ua hape paha mātou i ni’a i te ‘avei’a. ‘Ua hina’aro mātou e fa’a’ite i tō mātou pūai i teie nei mahana. ‘Aita mātou i ‘āpe’e i te mau poti, ‘ua fa’atea ra ‘e ‘ua manuia, he’e noa te va’a ».
E 8 tētoni e fa’ata’a nei ia Team OPT ia Shell va’a i te ‘āna’ira’a hōpe’a. ‘Aita i roa’a i te pupu 2 a OPT i te tāpe’a i te ti’ara’a mātāmua, mai nanahi ra, nō te hoera’a tuha’a. I te reo o te tāpena, ‘ua ‘imi « mātou i te rāve’a, pūai roa ra ‘o Shell i teie nei mahana. I te ha’amatara’a, mea fa’ahe’e noa mai mātou. I te tāpaera’a i Tiva tō mātou fifira’a, mea fa’aruru i te mata’i, tāui ato’a te topara’a hoe. ‘Ātīrā, ‘ua tupu maita’i ra teie nei hoera’a nō mātou ».
Tei te ti’ara’a toru ‘o Air Tahiti, i te hoera’a tuha’a ‘e i te ‘āna’ira’a hōpe’a. I te tuha’a Taha’a-Bora Bora e pāpū roa atu ai ‘o vai te ‘aito nō te Hawaiki Nui Va’a 2024.
TE ‘ĀNA’IRA’A :
Taure’a vahine :
1 EDT Va’a
Taure’a tāne :
1 Mataiea Hoe
2 Team OPT
3 EDT Va’a
Piri’a vahine :
1 Team Hawaii
2 Ka Lahui Kai
3 Ihilani Va’a
Mātuatua vahine :
1 Ruahatu
2 Nunue Va’a
Mātuatua tāne 60 :
1 Nunue Va’a
2 Tahaa Nui
3 Tahitian Paddle
