‘Ua riro te matahiti 2024 ei matahiti maita’i nō teie nei tamahine. Maoti tōna ‘aravihi nō te hōrue, ‘ua haru mai iana i te mau rē fa’ahiahia. Na mua roa, ti’ara’a 2 i te tata’ura’a Nissan Super Girl Surf Pro i Tarifonia. I roto i te ‘ā’ai o teie nei fārereira’a, o Kiara Goold, te tamahine ‘āpī roa a’e tei mau i teie nei ti’ara’a.
‘Ua roa’a ato’a iana te ti’ara’a 3 i te tata’ura’a Sunset Pro, ti’ara’a 9 i te tata’ura’a HIC Haleiwa Pro i Hawaii. Mau rē tei tūra’i iana i te ti’ara’a 4 o te ‘āna’ira’a hōpe’a nō te tuha’a Women’s QS matahiti 2024/2025.
« Matahiti maita’i roa teie nō’u. Nā roto i te ti’ara’a 4 o te tuha’a QS, e nehenehe au e tata’u atu i te Challenger’s series, tā’u ia e ‘oa’oa nei », i te reo ‘o Kiara Goold. ‘Ua ha’apāpū ato’a mai ‘ona e « ‘ua fa’aineine tu’utu’u-‘ore ‘ona iana nō terā mau tata’ura’a ».
Nō te matahiti 2025, ‘e’ita ‘o Kiara e ha’aparuparu, e tūra’i fa’ahou atu ā i te mau fa’aineinera’a. « E ha’apūai atu ā vau i te haere e hōrue ‘e te fa’a’eta’eta ato’a i te tino ».
Mai te na’ina’ira’a ‘o Kiara, tei muri noa tōna metua tāne, Moehau, iana. Tei pīha’i iho iana i te mau fa’aineinera’a ato’a ‘e nō te hōro’a i te mau arata’ira’a.
« Mea itoito ‘ona. Te ‘ite ato’a ra ‘ona e nā roto i te hōrue e tae ‘ona i te mau vāhi ato’a, e revareva noa ‘ona. E fārerei ‘ona i te mau ta’ata ‘āpī, hōrue i te mau ‘are nō te ao e ‘ite ato’a i te mau fenua ‘āpī », teie ia e te’ote’ohia nei e te metua tāne.
Te fā e titauhia ra e Kiara i teie nei matahiti, te ti’ara’a mātāmua nō te tata’ura’a QS tuha’a Tahiti/Hawaii.
I te ‘āva’e tiunu, tei ‘Auterāria ‘ona nō te tata’ura’a Challenger’s series, mā te ti’aturira’a e, e ō ato’a ‘ona i roto i te mau tata’ura’a ‘aito nō te ao nei Championship Tour, mai ia Vahine Fierro ra te huru.