Nō roto mai teie poti’i i te pupu Tamari’i Punaru’u, nō tōna roa 1,83 mētera te roa, mau mai iāna i te ti’ara’a ‘ōpere pōpō ‘e pāruru. I tōna ‘āpīra’a, ‘ua tere ‘e tāna pupu nō Puna’auia, i te fenua Aotearoa ‘e i Taratoni.
Matahiti 2022 tō Kohai Brothers fa’aru’era’a mai te fenua nō te fa’aō i roto te pupu ha’uti ASM Belfort i Farāni. Haere noa ai te pā’ira’a pōpō haere ato’a tāna ha’api’ira’a, ‘ua roa’a tāna parau tū’ite Baccalauréat. Piti matahiti ‘oia i roto i teie pupu na’ina’i nō te pae apato’a ia Farāni. I te ‘āva’e tiunu i ma’iri a’e nei, ‘ua nu’u fa’ahou te fāito o teie poti’i, tei ō i roto i te pupu ha’uti no Stella Calais. E pupu tāpurahia i te tuha’a « Élite » a te mau vahine pā’i popo, tōna aura’a e pupu pūai teie. O ‘oia te tamahine ‘āpī roa a’e o teie pupu ha’uti : » ‘Ua mana’o vau e haere mai e tāmata i Farāni i te mea i Tahiti, rave rahi mau pupu ha’uti tei ani mai e tomo i roto i tā rātou pupu. Mea nā reira vau i te fa’aotira’a e tūra’i atu ā i tō’u fāito », te mana’o ‘oa’oa teie ‘o Kohai.
19 matahiti tō Kohai i teie mahana, noa atu te ātea i tō te ‘ūtuāfare ‘aita teie tamahine nō Puna’auia e fa’a’ea nei i te ha’api’i. Nā roto i tōna haeha’a ‘e tōna mata ‘oa’oa, ‘ua manuia tāna matahiti ha’apa’arira’a « mea au nā’u e ‘arearea e ha’uti te ta’ata, terā ato’a tō’u pūai » ‘e « te vai ra tō’u feti’i ī’o nei, mea varavara roa mātou i te fārerei. ‘E’ere i te mea ‘ōhie ia noho ātea i te ‘ūtuāfare, ‘aita ra tō’u mōrare e paruparu ra ».
E ho’i mai ‘o Kohai Brothers i te fenua i teie hōpe’a ‘āva’e tiurai no te ha’uti ‘e te mau tuahine Taura’a i Bora Bora. ‘A tīa’i noa atu ai, ‘e’ita e ‘ore teie te pōti’i mā’ohi i te tomo atu i roto i te pupu ‘aito vahine nō te pā’ira’a pōpō nō Farāni. Tā tātou e fa’aitoito maita’i atu nei !
