I teie nei mahana, ‘ua fa’a’ite mai ā ‘o Kyle Taraufau i tōna pūai. Tāpa’ohia i roto i te pupu Air Tahiti Va’a, ‘o oia tei manuia mai na i te hoera’a Super ‘Aito. Nō teie tuha’a mātāmua, 1 hora 49 minuti ‘e 26 tetoni tōna hoera’a mai Tautira i Hitia’a : « ‘Ua tupu maita’i te hoera’a, tā’u ia e ‘oa’oa nei. Te pūpū nei au i teie rē nā tā’u tamahine. Māuruuru maita’i », i te reo o teie mā’ona nō Tautira.
126 rātou tei ‘āna’i atu i ni’a i te rēni fa’arevara’a i teie nei mahana nō teie nei tata’ura’a va’a hō’ē. 22 kirometera i te ātea Tautira-Hitia’a.
Nō te ‘āna’ira’a, Hotuiterai Poroi (Air Tahiti Va’a) i te ti’ara’a piti ‘e ‘o Hitiroa Masingue (Team OPT) i te ti’ara’a toru.
E tupu te piti o te tuha’a i te farairē 20 nō tetepa, e hoe te mau mā’ona mai Hitia’a ‘i Mahina, 27 kirometera i te ātea. Mahana mā’a, nō te tuha’a hōpe’a, mai Mahina i Mo’orea.
