‘Ua hope te taime ‘āparaura’a, ‘ua tae i te taime e fāriu i ni’a i te mau patura’a e ravehia ra i Teahupo’o ia ineine nō te heiva tū’aro nui. Te mau ‘ohipa ‘ia i vauvauhia e Moetai Brotherson i mua ‘ia Amélie Oudéa-Castéra, te fa’aterehau nui e ti’ā’au ra i te tū’aro ‘e te ha’api’ira’a.
« I teie hepetoma e haere mai nei ‘e ‘aore e piti hepetoma, e oti te tā’ato’ara’a o te mau pou ‘āpī », i te reo o te Peretiteni nō Pōrīnetia.
E riro rā, e oti hope roa te patura’a o te pa’epa’e a te tōmite hi’opo’a i te ‘āva’e mē, e tānohia i ni’a i te pu’etau o te tata’ura’a Tahiti Pro. Nō te tahi atu mau patura’a e au i te heiva tū’aro nui nō te hōrue, e naho ato’a te reira.
« ‘Ua oti teie ‘e’a turu, ‘ua tārenahia nō teie ‘āva’e e haere mai ra ‘e ‘ua oti a’e na, tā tātou ‘ia e ‘oa’oa nei. Te vai ra teie nei māhora nō Riri, fa’atata ato’a te oti te mau patura’a ‘i ‘ō. Te vai ato’a ra teie marina ‘āpī te tere maite ra te ‘ohipa ‘e teie mau fa’anahora’a i ni’a i te Domaine Rose, ‘ua naho te mau mea ato’a », ‘ia au te mau ha’apāpūra’a a te Peretiteni nō Pōrīnetia.
‘I muri mai i te parau o te Heiva tū’aro nui nō te hōrue, ‘ua tuatapapa-ato’a-hia te parau nō te Heiva tū’aro nō Pātitifā o te tupu i te Tahiti i te matahiti 2027. « Mai te huru ra, teie tā tātou Heiva tū’aro nui. Tīa’ihia ra 3000 mā’ona, 5000 ta’ata te tā’ato’ara’a, i te roara’a 3 hepetoma. Tītauhia e ‘ia ha’amaita’ihia te mau tahua tū’aro », i te reo ‘o Moetai Brotherson.
E riro rā e haere ato’a mai ‘o Amélie Oudéa-Castéra i Pōrīnetia nei i te area nō te 13 nō tiunu, ‘ia tae mai te rama.