Moto atu, moto mai. Piti ‘āva’e hou te heiva tū’aro no Pātitifā, te pe’ape’a nei i rotopū nā ‘āmuitahira’a e piti arata’ihia ra e Tauhiti Nena (Polynesian Boxing Association, PBA) ‘e Ismaël Tahiata (‘āmuitahira’a moto peretāne FBAPF).
I te ‘āva’e ‘ātete ra te ha’amatara’a teie ‘ohipa, i te fa’aotira’a te fa’aterera’a hau nō te tū’aro e fa’a’ore i te mana nō te tī’ā’aura’a i te moto tei mauhia na e te FBAPF, fa’a’otira’a tāna i horo i te tiripuna a te hau. I te tahi a’e pae, ‘aita tā te PBA e mana nō te tī’ā’aura’a i te moto.
Nō te ‘iriti i teie fifi, ‘ua ha’amauhia hō’ē tōmite ta’a’ē. ‘Ua fa’ari’i nā ‘āmuitahira’a e piti e fa’atupu te mau tīti’ara’a i te pō mahana maha, raro a’e i te mata ara a te tomite heiva tū’aro, te COPF. ‘Ua ‘āmui mai te mau mā’ona moto i te pō mahana toru nō te fāitora’a. Te fifi, o te feia moto ana’e a te ‘āmuitahira’a PBA tei ‘āmui mai, i fa’aoti ai te COPF i te turu i te ‘āmuitahira’a FBAPF, inaha ‘ua natihia ‘ona i te tōmite World Boxing.
‘Aita rā taua fa’aoitira’a i fa’atapitapi i te ferurira’a ‘o Tauhiti Nena. « A 8 matahiti i teie nei ‘aita tā mātou tauturu e horo’a-fa’ahou-hia, ‘aita te reira i ha’afifi ia mātou nō te fa’aō i roto i te ‘āmuitahira’a i te ara (International Boxing Association IBA, ‘o Tauhiti Nena te mono peretiteni), e ‘āmui ato’a mātou i roto i te mau tata’ura’a nō te ao ‘e ‘Ōteānia. A piti hepetoma i teie nei, ‘ua tū tō mātou mana’o e ia fa’atupuhia teie ‘āru’i motora’a. Te mea pāpū, ‘ia ‘ore te ta’ata e haere mai, e ha’apauhia ‘oe », i te reo ‘o Tauhiti Nena.
I tōna a’e pae, te nā ‘ō mai ra te ‘āmuitahira’a FABPF « te vai ra e piti fa’ahepora’a nō te fa’ao atu i roto i te heiva tū’aro. A tahi, ia natihia i te COPF e te ‘āmuitahira’a nō ‘ōteānia. ‘Ua tā’atihia ‘o Tauhiti i te ‘āmuitahira’a nō ‘ōteānia ‘aita ra i te COPF. Nō te ‘āmuitahira’a nō te ao nei, ‘o mātou ana’e tāna e ‘ite ra (…) nō te aha ia mātou e haere ai i te fāitora’a ?, i tāna uiuira’a.
Te nā ‘ō ra o Lionel Lao, te peretiteni nō te tōmite Ad hoc, nā te COPF e fa’atae i te tāpura i’oa o te mau mā’ona i te tōmite o te heiva nui nō te tū’aro. « E fa’ahope roa mātou i teie ‘ohipa. Teie nei tīti’ara’a i fa’atupuhia ai nō te mea e fa’aotira’a ‘āmui teie. Te mea e ‘itehia ra, ‘aita te mau mā’ona a te FBAPF i haere mai« .
Nā roto i te rāve’a niuniu paraparau, ‘ua ha’apāpū te peretiteni nō te COPF, Louis Provost, e ‘o te ‘āmuitahira’a peretitenihia ra e Ismael Tahiata ana’e teie e pāhono ra i te mau fa’aturera’a nō te fa’aō atu i roto i te heiva tū’aro nō Pātītifā. ‘Ua ani ato’a te tōmite nō te fārerei i te fa’aterehau nō te tū’aro, Nahema Temarii, ‘aita ā i pāhonohia mai ra.
