Italo Ferreira, teie te ‘aito rahi nō te Sisheido Pro 2024. ‘Ua ‘ite iana i te fa’a’ite atu i tōna ‘aravihi ia John John Florence.
Nō teie tuha’a hōpe’a, rahi te ta’ata tei tāpapa atu i Hava’e nō te mata’ita’i i te feiā hōrue. Te reira taure’a e tāna huru fa’ahe’era’a.
I te tuha’a ‘āfa hōpe’a, ‘ua tahua te taure’a Peretīria Gabriel Medina ‘ia John John Florence, nā taure’a e piti ‘itehia i te ao nei nō tō rāua faito teitei i roto i teie tū’aro. Ei hi’ora’a, ua roa’a ‘ia Medina te tai’o 10/10 i roto i te fārereira’a i rotopū ‘iana ‘e ‘o Jake Marshall.
I te tahi a’e pae, te ‘aro nei ‘o Ferreira ‘ia Yago Dora ‘e ‘i muri mai ‘ua ū atu ia Ramzi Boukhiam i te ‘āfa hōpe’a. Nā teie nei taure’a Marōta i fa’aātea i te ‘aito ra ia Kelly Slater.
Fāito maita’i o te feiā hōrue
Nō te tuha’a hōpe’a, tanotano maita’i te teitei te mau ‘are nō te tata’ura’a mai teie te huru. I te ha’amatara’a ihoa, 17.70 te nota a Ferreira, e piti ‘are tāna i fa’ahe’e. ‘Aita te reira i ha’aparuparu i te taure’a Vēhī ia John John Florence. 17.16 tei roa’a iana, iti roa nō te haru i te ti’ara’a mātāmua.
