‘Aita e nehenehe e parau i te pūai o teie nei mā’ona nō Bora Bora ! I teie nei ‘ōmuara’a hepetoma, tei Istanbul ‘o Tario Teraiharoa nō te tītau ā i te ti’ara’a ‘aito nō ‘Europa nō te tūha’a +120 kiro, e ‘ua manuia ! ‘Ua amo ‘e ‘ua tūra’i 235 kiro. I te ‘āva’e mē ‘i ma’iri a’e nei, ‘ua mau mai iana i te ti’ara’a piti nō ‘aito nō te ao nei.
« Puta pū te mafatu, te ha’amāuruuru nei au i te fatu nō te ‘ōperera’a mai i teie nei rē nā tātou, hō’ē fenua iti na’ina’i roa ‘ia fa’aauhia i te tahi atu. E 5 fenua o tei hina’aro i terā rē mātāmua. Te pūpū nei au i teie nei rē nā tō’u ‘utuāfare ‘i Bora Bora ‘e nā Pōrīnetia tā’ato’a », i te reo ‘o Tario Teraiharoa nā roto i te rāve’a niuniu paraparau.
I te mahana mā’a ra tō Tario taera’a atu ‘i Istanbul, toru mahana i muri iho tei ni’a i te tahua ‘arora’a. E tōna hoa Dimitri Bonnay, ‘aito -120 kiro, ‘ua mau mai ia rāua i te ti’ara’a 2 nō te tuha’a tāpupu, i muri mai i te fenua Heremani.
Mōnirē ‘o Tario e ho’i mai ai i te fenua nei. Tōna manuia nō roto ato’a mai i tōna ‘utuāfare : « te hina’aro nei au e ha’amāuruuru ato’a i tā’u vahine tei turu pāpū maita’i ia’u i roto i teie tū’aro ».
E tāmau ā ‘ona i te mau fa’aineinera’a, iana iho ‘e i te mau taure’a ato’a tāna ‘āpe’e ra, inaha e peretiteni ‘ona nō te pupu Fa’anui Gym, ‘i Bora Bora. « Te tāhō’ēra’a, mai te mea ‘ua tae mai au i’o nei e nehenehe ato’a te u’i ‘āpi e tapae. I roto i tā’u pupu te vai ra 15 mero ».
Nō tōna hina’aro e tūra’i ā i te amo tāpau ‘i Bora Bora, te mana’o ra ‘o Tario Teraiharoa e fa’arahi i tāna vāhi fa’aineinera’a.
