235 kiro, ‘aita i rava’i nō Tario Teraiharoa nō te haru i te feti’a ‘auro. ‘O Umar Abdullah, te ‘aito, 250 kiro tei amo ‘e tūra’ihia e ana i te tata’ura’a Masters 1, tuha’a hau i te 120 kiro.
Te mea pāpū, ‘ua ha’amaita’i ā te taure’a Pora Pora i tōna pūai. I te matahiti 2023, tei iana te ti’ara’a toru. Te vai noa ra ā te ti’aturira’a e roa’a iana te feti’a ‘auro i te mau fārereira’a i mua nei. « Ei ta’ata pāutuutu maita’i ‘e te pūai ato’a nō te tapae i terā faito. ‘Ua amo a’e na vau 240 kiro ‘i Pora Pora. Te ‘oa’oa nei ra vau i te fa’aho’ira’a i te feti’a moni nō Pora Pora ‘e nō Pōrīnetia tā’ato’a ».
Turuhia e te ‘āpo’ora’a ‘oire nō Pora Pora, te hina’aro nei ‘ona ‘ia fa’arahihia te vāhi fa’aineinera’a. « Mea na’ina’i roa, ‘e’ita e rava’i nō te fa’aineine maita’i, i tōna reo. ‘Aua’a ‘ua tae mai te mau mātēria (…) ‘Aita vau e ha’ape’ape’a ra, e roa’a ihoa terā feti’a (‘auro) ».
Tei ia Djanny Wong Hen te ti’ara’a 5 tuha’a master raro mai i te 120 kiro, 195 kiro tei amohia e ana. Tommy Teheura, ti’ara’a 6, 250 kiro te taiaha o te tāpau e ‘ua tūpa’i ia Romuald Massé, te ‘aito nō Farāni.
E tae mai ‘o Tario i Tahiti i roto i te ārea 2 hepetoma nō te fa’aineine i te harura’a ‘āu’a nō Pōrīnetia, ‘āmui ato’a mai 10 mā’ona nō Pora Pora.
