I teie nei farairē 16 nō ‘ātete te mau tata’ura’a hoera’a vitiviti e tupu ai ‘i Hilo. A tīa’i noa atu ai i tāua ta’io mahana ra, tei fa’aineine nei tō tātou mau mā’ona. « ‘Ua tāmata mātou i te mau va’a, mea ha’eha’a te mau parahira’a ‘e mea māmā ato’a te va’a. I ni’a i te tai, hō’ē ā ato’a, tītauhia e hi’o i tōna huru ia au i te mata’i », i te reo ‘o Eric Moasen, mātuatua nō te pupu Ra’iātea.
I te pae o te mau taure’a, ‘aita i ta’a’ē atu i te mau mātuatua. « Fa’ata’ahia teie nei mahana nō te tāmata i te va’a, i te hoe ato’a (…) Nō te ama, ‘e’ere i te mea ‘ōhie i tanohia te mata’i na te ‘ao’ao mai », i te hi’ora’a a Vaimiti Maoni nō te pupu Ihilani Va’a.
« Te vai ra te mau pupu tei fa’ari’i i te feiā hoe nō rapae, te aura’a nō terā mau pupu ‘aita i tae mai. Te vai ato’a ra te mau pupu faito teitei, pi’ihia « elite ». Nō rātou, ‘ua tupu te mau titi’ara’a ‘i Tahiti nō te mau va’a 6 ‘e ‘aore ra va’a 1″, i te mau ha’apāpūra’a a Erick Moasen.
Mai te tā’ato’ara’a o te mau pupu, te ti’aturi nei ‘o Ihilani Va’a e haru mai i te mau rē ato’a : « Tei i’o nei mātou nō te upo’oti’a. I roto i teie nei pupu, e 3 māona nō roto mai i te mau pupu ‘e 3 mā’ona faito « elite » taure’a. ‘Ua ‘āmui mātou ‘ia roa’a te mau nūmera maita’i ».
Ha’apūroro-ti’a-hia te mau tata’ura’a mai te 16 nō ‘ātete, teie te tārena
