Nā Thomas AMASIA nō te pupu Toromona ‘i tītō ‘i te tāpa’o mātāmua ‘o teie hā’utira’a ‘e te mau Tiki Toa. ‘Aita ‘i māoro, teie mai nei te tāpa’o fa’a’aifāito nā pupu ‘e piti, tu’ehia ‘e Heirauarii SALEM pi’ihia « Bibiche » ‘āfaro roa ‘i roto i te mau ‘ūpe’a ‘a Toromona. Haere mai te piti ‘o te tāpa’o nō roto mai ‘ia Teaonui TEHAU. ‘I te hōpe’ara’a ‘o te tuha’a mātāmua, 1 nā Toromona, 2 nā Tiki toa.
‘I roto ‘i te tuha’a piti, ‘e piti noa tāpa’o ‘i tītōhia. Mau pōpō tu’ehia ‘e te pupu nō Tahiti, hō’ē nā Patrick Tepa ‘e te maha ‘o te tāpa’o nā Tamatea TETAUIRA.
Tau minuti noa ‘i muri mai te ha’amatara’a ‘o te tuha’a toru, ‘ua hōro’a te ra’atira pupu Tiki toa, Raimana LI FUNG KUEE ‘i te hi’ora’a ‘i tāna feiā ha’uti, nāna ‘i tītō te pae ‘e te ono ‘o te tāpa’o. Te hitu ‘o te tāi’o, mea tu’e puaihia ‘e Heiarii TAVANAE, haere mai ai te va’u tu’ehia ‘e Roonui TINIRAUARII. ‘Aita ra tō Toromona, ‘i ha’amarirau nō te pāhono, teie mai nei te tāi’o hau, ‘e toru atu ra ia nā Toromona. Piti minuti hou ‘a hope ai te hā’utira’a, tīteti ‘ute’ute nā AMASIA. ‘I te mau tetoni hōpe’a, ‘i ni’a ‘i te tu’e tāpa’o ‘a « Bibiche », 10 tāi’o nā Tiki toa ‘e toru nā Toromona.
‘E riro teie nā pupu ‘e piti ‘i te fārerei ā ‘i teie mahana mā’a nō te tūha’a hōpe’a. ‘Ananahi ‘i te hora maha ‘i te ahiahi, ‘e fārerei te Tiki toa ‘i te pupu nō Fītī.
