Maita’i te reva i teie nei mahana nō te hoera’a mai Taha’a i Bora Bora.
‘Ume’ume noa te pupu OPT ‘e Air Tahiti i te tomora’a mai i Te Ava Nui e tae atu i Matira.
‘Ua tāpe’a noa ‘o Air Tahiti e ‘ua mau mai i te ti’ara’a mātāmua nō teie nei tuha’a hōpe’a 60 tiromētera i te ātea. Tāna tai’o uāti 4 hora, 16 minuti ‘e 48 tetoni.
I muri mai, OPT, ti’ara’a piti nō te hoera’a tuha’a. ‘Ia numerahia ra tāna tai’o uāti mai te ha’amatara’a o te tata’ura’a, ‘o ‘ona te ‘aito nō teie Hawaiki Nui Va’a mai tei tupu i te matahiti 2023. Nō na tuha’a e toru, te tai’o uāti 9 hora 27 minuti 25 tetoni.
Teie ia e ‘oa’oahia nei e ta’ata fa’aineine, Georges Cronsteadt. « ‘Ua mata’u ri’i au i te ‘ōmuara’a nō te mea ‘aita vau i matau maita’i i te feiā hoe nō te pupu nei. ‘Ua fa’a’ite mai rātou e nehenehe au e ti’aturi ia rātou. ‘Ua haere rātou e ti’i i te rē ».
Te pupu ‘aito nō te hoera’a tuha’a Taha’a-Bora Bora, ‘o Air Tahiti. I te ‘āna’ira’a hōpe’a tei ia na te ti’ara’a piti, e piti tetoni e fa’ata’a nei ia na ia Shell va’a.
« Hope te ‘oa’oa. ‘Ua tītau mātou hō’ē ti’ara’a fa’ahiahia nō te tuha’a hōpe’a e ‘ua manuia. ‘Ua ‘āpe’e noa mātou i te mau pupu. I tō mātou taera’a i roto nei, i reira tō mātou tūra’ira’a, tāere-ri’i-hia ra mātou nō te mea tei piha’i iho noa atu ‘o OPT », i te reo o te pēperu, Hotuiterai Poroi.
Shell va’a te ‘aito nō te tuha’a Ra’iātea-Taha’a, tei mau mai i te ti’ara’a toru i te ‘āna’ira’a hope’a.
« Fa’ahiahia roa vau i tā’u pupu », i te reo ‘o Charles Teinauri, « e feiā ‘āpī ana’e (…) te toe ā ra te tahi mau fa’atanora’a. Nō te tata’ura’a mai teie te huru, e ha’apa’ari te ferurira’a ‘e mea fa’aineine-ātea-hia ».
