‘Aita e ha’amariraura’a, nō hope noa a’e nei te mau ‘ōro’a, tītauhia e ha’amata i te mau fa’aineinera’a tei tupu ‘i te tahua Pater. ‘Inaha, mai tō rātou ihoa upo’oti’ara’a i te harura’a ‘āu’a ‘a te mau hau (Coupe des Nations) ‘i te ‘āva’e ‘ātete, i mua ‘i te fenua Toromona. ‘Aita atu e fā tā Teva Zaveroni e tāna pupu, ‘oia ho’i, ‘e ti’i i teie ‘āu’a no te ao, ‘i te fenua Dubaï.
« Pāuroa tā mātou fā mātāmua, hāere ihoa ia e ti’i teie ‘āu’a. Teie nei, ua ‘ite mātou te mau mea nō te fa’aineine-maita’i-ra’a ‘ia mātou. ‘E ua ‘itehia teie mahana, tā mātou fa’aineine ra’a » te reo ‘o Jonathan Torohia, te tīa’i tāpa’o a te pupu Tiki Toa.
E mai tei mātauhia ‘i te mau matahiti ato’a, ia tupu te mau harura’a ‘āu’a, e tihepu mai te pupu Tiki Toa, i te tahi mau taure’are’a ‘āpī, nō te ha’apa’ari te pupu. « I teie mahana, e piti tei tomo mai i roto i teie pupu tā mātou. I teie nei, nā mātou e fa’aineine maita’i terā e piti, ia hā’uti maita’i rāua ‘i teie harura’a ‘āu’a » i te mana’o ‘o Jonathan Torohia.
Nō te ti’i teie ‘āu’a nō te oo, tītauhia e ha’apa’ari ato’a i te mau fa’aineinera’a. Ua ha’amatahia i te fenua nei : « ‘Nō te haere terā tū’aro teitei, nō te haere e ‘aro teie mau pupu nō ‘o, ‘e’ere ‘i te mea ‘ōhie. Nō te reira, te fa’aineine maita’i rā mātou » Teva Zaveroni, te ta’ata fa’aineine nō te pupu Tiki Toa.
Tera rā, e rave-ato’a-hia te tahi tuha’a nō teie fa’aineinera’a ‘i te fenua Peretiria, toru hepetoma hou te mau hā’utira’a rahi ‘a tupu ai. Te tumu, rahi te mau pupu maita’i i roto i te harura’a ‘āu’a nō te ao. « Mana’o ana’e vau, te vai rā, te fenua Irane, pupu pūai roa, te vai ra ato’a ‘o te fenua Pāniora, mea pūai ato’a rātou. Te fenua Potītī ‘e Peretiria, mana’o ana’e vau, teie te pupu pūai roa ‘i roto ‘i teie harura’a ‘āu’a nō te ao » Teva Zaveroni.
E tupu te hā’utira’a mātāmua ‘a te pupu Tiki Toa ‘i te ‘āhuru ma pae (15) nō fepuare, fa’aū atu ‘ona ‘i te pupu nō Rāparata. Tā tātou ato’a ia e hina’aro ra e fa’aitoito maita’i i tō tātou mau ‘aito.
