A tahi nei hō’ē tamari’i nō te fenua nei a huru ai te ti’ara’a ‘aito nō te tata’ura’a Tahiti Pro. I roto i te tuha’a hōpe’a a te mau vahine, ‘ua ū atu ‘o Vahine Fierro i ni’a ia Brisa Hennessy nō te fenua Costa Rica.
Mai te ha’amatara’a o te tata’ura’a, ‘ua ‘itehia te ‘aravihi ‘o Vahine Fierro. I te mahana mā’a i ma’iri a’e nei, ‘ua upo’oti’a ‘ona i ni’a ‘ia Molly Picklum, ‘e i ni’a ia Tatiana Weston-Webb i roto i te tuha’a ‘āfa hōpe’a.
‘Ua ‘ite ‘o Vahine Fierro te huru ‘o Hava’e, ‘aita i mata’u i te mau ‘are. I ni’a noa i te ‘are mātāmua, e tai’o maita’i tei roa’a mai ‘iana, 8.50. ‘Ua tupu te ‘ume’umera’a ‘i rotopū ‘iana ‘e ‘o Brisa Hennessy, ‘aita i rava’i ia nehenehe i te vahine Costa Rica i te haru i te ti’araa mātāmua. Tai’o hōpe’a, 15.17 nā Vahine Fierro.
« ‘Ua rohirohi roa vau. ‘Ua roa’a ia’u te mau ‘are fa’ahiahia roa a’e. ‘Ua fa’ahe’e au i te mau ‘are teitei, ‘aita ra vau i tu’u », i te reo ‘o Vahine Fierro.
E riro teie nei rē i te fa’afa’aitoito i teie ‘aito vahine nō Raromata’i ‘inaha e tata’u ato’a atu ‘ona nō te heiva tū’aro nui o te tupu mai te 27 tae atu i te 30 nō tiurai. Te ti’aturira’a, ‘ia roa’a mai ‘iana te feti’a ‘auro. E ū atu ‘ona ia Janire Etxabarri nō te fenua Paniora ‘e ia Sol Aguira nō te fenua Perou.
