‘Ua tupu tei moemoeāhia e Vahine Fierro, ‘ua ō ‘ona i roto i te pupu o na vahine 16 ‘aravihi roa a’e nō teie nei tū’aro, ‘ati a’e i te ao nei. Te ti’aturira’a, ia riro mai ‘ona ‘ei ‘aito vahine nō te ao nei.
‘Ua roa’a ia na i teie nei ti’ara’a ‘inaha ‘ua tāpae ‘ona i te faito hōpe’a o te tata’ura’a Saquarema e tupu ra i te fenua Peretīria.
“E matahiti fa’ahiahia roa teie nō’u » i te reo ‘o Vahine Fierro tei uiuihia e te ‘āmuitahira’a farāni nō te hōrue. I teie nei matahiti, ‘ua ora mai ‘ona « i te mau taime ‘oa’oa e te hepohepo ato’a », nō te ‘orera’a i manuia i te heiva tū’aro nui.
“Te pūpū nei au i teie ti’ara’a nā tō’u ‘utuāfare feti’i, tō’u mau hoa ! ‘E’ita vau e huna, i teie nei po’ipo’i, tapitapi tō’u ferurira’a, ‘aita tō’u mana’o i topa. I teie nei taime, hope tō’u ‘oa’oa. ‘Ua ‘ite au ‘aita ‘o Luna (Silva) i manuia i roto i tāna tuha’a ‘e ‘ua ‘ite ato’a vau te vahine e manuia i roto i tā’u ‘āna’ira’a, ‘o ‘ona te ō atu. Nō reira, ‘aita vau i ha’aparuparu », i te reo ‘o Vahine Fierro.
Nā roto i teie nei ti’ara’a ‘āpī tō Vahine Fierro ‘e te feti’a ‘auro i haruhia mai e Kauli Vaast i te heiva tū’aro nui, ‘ua riro te matahiti 2024, ‘ei matahiti fa’ahiahia nō te mau mā’ona nō te fenua nei.
