Fānauhia ‘o Hare, Salmon, Paling Ly Mou Yn mātau-noa-hia na ‘i te pi’i Tavana Salmon, i Pape’ete. ‘Ua tere nā ‘Ōteania ‘e i te fenua Vaihī ‘itehia tōna parau i roto i te ha’afaufa’ara’a i te peu tumu. I te 13 nō tēnuare i topa a’e nei, ‘ua fa’ahanahana te ‘āpo’ora’a ‘oire nō Pā’ea i te mahana fānaura’a o teie mātuatua. « Mea huru fifi i te fa’atū’ati tō tātou orara’a i ni’a i teie huru peu tāna e rave ra. Tera ra, te ‘itehia ra e tae mai i teie mahana, tera ihoa tāna mau mā’a e tamauhia ra e ana ‘e tae noa atu te mau inura’a tāna i mātau maita’i. Peneia’e, ‘ua rata ihoa ia tōna tino », te reo o te tavāna Anthony Geros.
Ia au ‘i te ‘āfata rātio « Radio 1 » i teie mahana piti tō Tavana Salmon fa’aru’era’a mai, i te 104ra’a o tōna matahiti. Fa’aha’amana’ohia tōna parau i roto i te fa’anahora’a « Tahiti tatoo fest » te tupu mai te 28 nō novema e tae atu i te mahana mātāmua nō tītema.
Nā ni’a i te i’oa o te mau fa’atere ‘e te mau rave ‘ohipa a TNTV, te fa’atae atu nei mātou i te tāpa’o tāmāhanahana i tōna fēti’i ‘e tōna mau hoa piri.
