Muri mai tōna fa’ahanahanara’a ‘i tōna ti’ara’a feti’a ‘auro nō teie heiva tū’aro nui Paris 2024, ‘ua ho’i mai ‘o Kauli Vaast ‘inapo ra. Tau mahana ‘i Paris, ‘i reira ‘oia ‘i te fa’ari’i hanahanaha ra’a-hia ‘e te nūna’a, parauparau ato’a ‘oia ‘i te mau pāpa’i ve’a nō te poroono.
« Nā te reira ‘i fa’aineine iā’u nō te ‘ōpani teie mau tata’ura’a ‘o te heiva tū’aro nui. Hō’ē noa taime i roto ‘i tō ‘oe orara’a ‘e ora ai teie ‘ohipa. Fārerei ato’a vau ‘i te mau pāpa’i ve’a. Mea fa’ahiahia roa, tera ra, te ‘oa’oa nei au ‘i te ho’i mai ‘i te fenua », te reo teie ‘o te ‘aito hōrue nō tahiti iti.
Fārerei ato’a ‘o Kauli Vaast ‘i te mau ‘aito ato’a nō Farāni: « ‘Ua piri roa vau ‘i te mau ‘aito ‘o teie heiva tū’aro nui, mai ia Léon -Marchand, Ndlr- tei haru mai ‘e 4 feti’a ‘auro, putapū te ‘a’au (…) riro ato’a ra ‘ei fa’aitoitora’a ia’u. ‘Eaha te ‘ohipa ‘e ‘ōpani nei ‘e ō ‘i roto ‘i te mau heiva tū’aro nui ‘ananahi ? »
![](https://www.tntv.pf/tntv/wp-content/uploads/2024/08/Kauli-V2.jpg)
‘E ‘ua ‘ite mata roa atu teie tamaiti nō Vaira’o ‘i te rahira’a ta’ata ‘e ora ra ‘i Farāni tei ‘āpe’e ‘i tāna tata’ura’a « Rahi te ta’ata tei māta’ita’i tā’u mau tata’ura’a. ‘Ua maere roa vau (…) naho’a ta’ata tei ‘oa’oa ‘i tō’u harura’a mai teie feti’a(…) rahi fa’ahou atu ā ia te ta’ata te mātau iā’u i te fenua Farāni», te reo ‘ata’ata teie ‘o Kauli Vaast.
Ta’a’ē noa atu te reira, ‘ua ho’i ato’a mai te ‘aito mātāmua nō te tū’aro hōrue ‘i te heiva tū’aro nui, ‘i ni’a ‘i tāna hōruera’a ‘i roto i te ‘ānāvai rahi nō Farāni ‘oia ho’i te Seine « taime poto teie ‘ōpuara’a ‘i te fa’aineine ra’a-hia, 24 noa hora » : « ‘Aita vau ‘i mana’o ‘e rave roa teie ‘ohipa (…) ‘iri hōrue tā’u nō Teahupo’o. ‘Ua fa’anaho vitiviti-hia teie ‘ohipa, tera ra mea fa’ahiahia roa ».
![](https://www.tntv.pf/tntv/wp-content/uploads/2024/08/Kauli-V3.jpg)
Nō teie mau mahana ‘i muri, te mana’o nei ‘o Kauli Vaast « ‘e fa’afa’aea ri’i ». « Mai te ha’amatara’a mai te tata’ura’a hōrue ‘e tae mai teie mahana, ‘aita vau ‘i fa’aea hō’ē noa a’e taime (…) » Kauli Vaast.
Te feiā fa’aitoito, te ‘utuāfare ‘e tōna mau hoa tei tāpapa atu te tahua taura’a manureva ‘inapō ra nō te fa’ari’i te ‘aito. « Te ‘oa’oa nei au, ‘ua ho’i mai ‘oia » te reo teie ‘o te mama rū’au « Mamie Alice ». « Te fa’ahiahia nei au ‘i tō’u taea’e, ‘ua mou mai iā na te feti’a ‘auro nō teie heiva tū’aro nui » Naiki te taea’e ‘o Kauli Vaast.
![](https://www.tntv.pf/tntv/wp-content/uploads/2024/08/Kauli-V4.jpg)
Te peretiteni nō te ‘āmuitahria’a ‘o te feiā hōrue tei ti’a atoa atu ‘i roto ‘i teie ‘ōro’a fa’ari’ira’a. « ‘Ia vai haeha’a noa ‘ōna (…) tera tā mātou ‘e hina’aro. ‘E mea pāhono maita’i ‘ōna ‘i te mau uira’a (…) ‘Ua rave maita’i ‘ōna ‘i tāna ‘ohipa. ‘Ua hōro’a ‘ōna ‘i te hō’ē hi’ora’a maita’i nō pōrīnētia. Te fa’ahiahia nei mātou nōna », te reo māuruuru ‘o Max Wasna.
‘E riro te hō’ē ‘ōro’a ta’a’ē ‘i te fa’aineine hia nōna ‘i Tahiti Iti taime nō te nūna’a mā’ohi nō te ha’amāuruuru ā ‘i tāna ‘aito.