Ho’ira’a tīa’ihia teie ‘e te mau feti’i ‘e te mau hoa tei tāpapa mai ‘i teie nei mahana toru po’ipo’i ‘i te tahua taura’a manureva nō Tahiti-Faa’a. ‘Ua tāpae mai te pupu mā’iti nō Tahiti ‘e te mau feti’a tei roa’a ‘ia ratou ‘i te tata’ura’a nō te ao nō te tautai nā raro ‘i te moana, tei tupu nā ‘i te hōpe’a hepetoma ‘i mā’iri a’e nei ‘i Laredo ‘i te fenua Pāniora.
‘I roto ‘i te ‘āna’ira’a hōpe’a, tei te ti’ara’a piti te pupu ‘a te mau vahine, ‘āre’a ra te pupu ‘a te mau tāne ‘e feti’a veo ‘ia tei fa’aho’ihia mai. Mau nūmera hau atu ‘i te maita’i ‘e te fa’afa’aitoito ato’a ‘i te mau ta’ata nō teie nei tū’aro.
« ‘Aita ‘e nehenehe ‘e parau ‘i tō’u ‘oa’oa nō te fenua ‘e nō te mau vahine ato’a ‘i roto ‘i teie tū’aro », te mau mana’o mātāmua ‘o Onix Lebihan, ti’ara’a toru nō te tata’ura’a tāta’i tahi, ‘e feti’a moni ‘i te tata’ura’a pupu vahine.
« ‘Ia mana’o vau, ‘e piti noa i’a hau tā te ‘aito no te ao ‘i tā’u. Tāpa’o fa’a’ite terā ‘e mea matau ‘ona ‘i te mau vāhi ‘i tautaihia na ‘e mātou. Mea iti roa te ‘ohipa ‘i fa’ata’a’ē ‘ia māua, ‘aita ra ‘e pe’ape’a », ‘i te mau ha’apāpūra’a ‘a Onix.
« ‘E TĪTAU ‘I TE TI’ARA’A TEITEI ROA A’E »
Mata ‘ata’ata ato’a tō Taina Orth : « ‘E ‘oa’oa iti rahi tō’u ‘i te maura’a mai ‘i te ti’ara’a pae ‘i roto ‘i te tata’ura’a tāta’i tahi ‘e hau atu ‘i te te’ote’o ‘i te ti’ara’a toru ‘o tō’u hoa tautai, ‘a tahi nei ‘i roto ‘i te ‘ā’ai ‘o te fenua nō te pupu ‘a te mau vahine. ‘E fa’aineine ā ia nō te mau tata’ura’a nō te ao nō te matahiti ‘i mua. ‘E haere tītau ‘i te ti’ara’a teitei roa a’e. ‘Oa’oa roa mātou ‘i te amora’a ‘i te ro’o ‘o te fenua ».
‘E’ere ato’a te mau tāne ‘i te mea ‘ino ‘i roto ‘i teie nei tata’ura’a, teie ato’a ia ‘e ‘oa’oahia nei ‘e Taea Mauiarii, ti’ara’a pae. « ‘E’ere te ‘oa’oa nei nō’u (…) 1 tae atu ‘i te 2 matahiti nō te fa’aineinera’a (…) ‘E ‘ere ‘i te mea ‘ōhie, ‘e mau ‘aito ana’e tei ‘āmui mai (…) Mea rahi te ‘ohipa tā mātou ‘i ora mai ».
‘I te ‘āva’e nō māti, ‘e ‘āmui atu te pupu nō Tahiti ‘i te mau ha’utira’a nō ‘Ōteānia tei tarēnahia ‘i te fenua Niu Terani.
