E fa’a’orehia te tute tōtiare i te mahana mātāmua nō ‘ātopa. Rave’a nō te fa’aiti i te ho’o o te orara’a.
Ia au i te hau fenua, e « fa’atopa te reira i te mau tārifa i ni’a i te faito 1,6 tae atu i te 1,8%. Te ravehia nei te mau hi’opo’ara’a ia fa’atopa ihoa te mau taiete i te mau tārifa ‘ia ‘ore te tute ».
I te pae o te mau taiete, ‘ua pia te piha ‘ohipa e tī’ā’aura’a i te mau tute hō’ē parau fa’aarara’a i ni’a i te mau tauira’a ia fa’a’orehia te tute tōtiare :
Tae mai i teie nei mahana, nā teie nei tute e fa’a’ī na i te ‘āfata tōtiare (FPSU). Tuhahia atu ai i roto i te ‘āfata a te mau rave ‘ohipa ‘e te ‘āfata RST. Te aura’a, e ‘imi ia te hau fenua e nāhea ra i te mono 8 tae atu i te 9 miriā i te matahiti.
‘Ei fa’aha’amana’ora’a, ‘ua ha’amauhia te tute tōtiare i te mahana mātāmua nō ‘eperēra matahiti 2022, e te fa’aterera’a a Edouard Fritch, nō te fifi e fārereihia e te ‘āfata PSG. Fa’a’ohipahia na teie nei tute i ni’a i te mau tao’a e tōro’a ato’a.
