‘Aita te nehenehe ‘o Bora Bora ‘e huti noa mai ra te rātere nō te ao nei ‘e tā rātou mau ha’amau’ara’a. Mau ha’amau’ara’a e huti ato’a mai ‘i te tapiho’ora’a o te rā’au ta’ero Ice, tei ‘ū’ana roa i roto i te feiā ‘āpī ‘ia au i te ra’atira mūto’i ‘oire nō Bora Bora Steven Geva » Te ‘ohipa pāpū nei te feiā ‘āpī ‘e ‘o rātou teie e ani nei i teie rā’au ta’ero Ice, ‘e te mau motu ‘i pīha’i iho noa, ‘ua ‘ite rātou ‘ia ho’ohia 60 000 te tarāma, ‘oi’oi noa ia i te mahere. Terā te fifi. »
Te ‘ohipa ‘o tā teie rā’au ta’ero ‘e fa’atupu, ‘aita ia ‘e faito tō te ‘ino. E vāvāhi roa te ‘utuāfare. O te fifi ato’a ia ‘e fa’aruruhia ra ‘e te hō’ē metua vahine tei hunahia te hōho’a mata, tāna tāne tei topa ‘i roto i teie ‘ati. Noa atu te maita’i ‘o tāna tāne, ‘aita e noa’a fa’ahou ra iāna ‘i te ‘oroma’i i mua i tāna mau hāmani-‘ino-ra’a. Te ri’ari’a nei teie vahine teie mahana, ‘ia pohe ‘oia. Nō reira ‘oia i fa’aoti ai ‘e parau, ‘i te mea ‘i tōna reo, « i Bora Bora, tei te mau vāhi ato’a teie ta’ero ».
‘I te mea, ‘o te fifi rahi ato’a ‘i Bora Bora, ‘i mua i te mata o te ta’ata teie rā’au ta’ero Ice ‘e ho’oho’ohia ai. « ‘E’ita e ho’o-fa’ahou-hia i te mau vāhi ‘omo’emo’e mai te mātāmua ra, ‘aita. Te ho’ohia ra i te hiti purumu. ‘Ia tae ana’e mai te ICE, e ‘ite-noa-hia te mau pereo’o tārahu ‘e teretere noa ra. Haere noa mai ‘oe, tāpe’a te ta’ata ho’o ICE, ‘aufau atu tā ‘oe, reva atu ai. »
E ‘ua hitima’ue teie metua vahine i te taera’a teie ‘ino i tō rātou fenua, i teie mea, ‘aita te ICE e fa’ata’a te ta’ata o tāna e momi atu, tei te mau vāhi ato’a ‘e te mau huru ‘utuāfare ato’a. « Tā’u tamaiti, tō’u te reira hihi mahana, mai tōna tamari’ira’a mātou ārata’ira’a mai iāna i roto i te tū’aro, ‘e i tō’u mana’o, i roto te tū’aro, e mea pe’ape’a roa…nō te mea teie fifi e ho’o nei te Ice i te tamari’i, ‘e mau ta’ata e orara’a maita’i i roto i te tōtaiete, roto te fa’aro’o ānei, mau tā’atira’a. E mau metua tāne, tamari’i tō rātou, orara’a maita’i. »
Hau roa atu, ‘i mua i te pararera’a o teie rā’au ta’ero ICE, ‘aita te mau ‘utuāfare e ti’aturi rahi ra i te mau mūto’i. « Ua ‘itehia ‘o vai mā teie mau ta’ata e ho’o ra teie rā’au ta’ero Ice, mai te mea ra ē, te pāruruhia ra rātou. » ‘I mua i te mau uiuira’a a te mau ‘utuāfare ‘ati, te pāhono nei te ra’atira mūto’i ‘oire Steven Geva, « ‘ua ‘ite au, te tumu vau i fa’aō ai i roto i te ‘āua mūto’i ‘oire. E te ti’aturi nei au e, ‘ua ‘ite ato’a tō’u mau hoa mūto’i, te tumu rātou i fa’aō ato’a ai. E ti’ara’a mana tō mātou, ‘ua ‘ite rātou te mau utu’a, a hahi noa atu ratou i te ‘ē’a. »
E au ra e, nā te moana teie ra’au ta’ero Ice taera’a mai, no roto mai i te mau motu tāpiri noa. « Piti matahiti tō mātou ‘ite noa ra’a te feiā haere noa mai ‘i Bora Bora, nō Huahine ihoā ra. ‘Āmui ratou i te feiā ho’oho’o mā’a. ‘Ua ha’amata mātou ‘i te uiui te mana’o i ni’a ‘i teie feiā ‘e haere mai ra ‘e tapiho’o ‘iō nei ‘i Bora Bora nei, ‘i ni’a ia ‘i teie mau vāhi ho’oho’ora’a mā’a. E ‘ua ‘itehia, ‘aita rātou ‘e ho’o noa ‘i te mā’a, ho’o ato’a ra te tāo’a ‘ōpanihia e te ture. E ‘ohipa teie ‘i ha’apāpū-roa-hia mai. »
E nō te ‘arora’a i teie fifi o te Ice, e fatu mai te ‘oire nō Bora Bora, ‘e piti ‘ūrī. Hō’ē nō te pāherura’a i te rā’au ta’ero ‘e hō’ē nō te pārurura’a. Te patuhia ra te vāhi fāri’ihia ai teie mau ‘ānimara. ‘Āva’e tītema ‘i muri nei, hō’ē o teie mau ‘ūrī te fa’a’ohipa-roa-hia i ni’a i te tahua.
‘A tīa’i noa atu ra, 33 feiā ‘āpī, tei roto i te hi’opo’ara’a tāmau ‘a te mau mūto’i ‘i Bora Bora i te ‘ōmuara’a o teie matahiti.
