‘E’ita e ‘ore te ua i te topa rahi i teie nei pō. Tei raro a’e te mau motu ni’a mata’i e raro mata’i i te fa’aarara’a ‘ū puatou. I teie nei mahana toru, rahi te mau vāhi tei tomo-haere-hia e te pape i Bora Bora, Ra’iātea, Taha’a, Maupiti ‘e Huahine ato’a. ‘Ua vai ineinei noa te mau ‘oire ia tupu noa atu te fifi. ‘Ia au i te pū ‘ohipara’a a te tōmitēra teitei, ‘ua mutu te ‘ōperera’a uira i te tahi mau tuha’a. ‘Ua ha’afifi ato’a te vero ua i te mau fare ha’api’ira’a, nō reira ‘e vai ‘ōpani vetahi i teie mau mahana i muri nei, nō te tamāra’a e nō te tāta’i ato’a.
Tei roto te mau pū ‘ohipara’a a te hau nui e te hau fenua i te fa’ateateara’a i te mau porōmu, nā reira ato’a te ‘ōperera’a uira ‘e niuniu parauparau.
Te haere ti’a mai ra te vero ua i te mau motu ni’a mata’i nei. E topa rahi te ua e tae atu ‘ananahia ia pō.
‘Ua tu’u te pū mitora’a nō te reva Météo France i te mau motu i te ‘apato’a hitia’a o te rā nō Tuamotu i te tāpa’o ‘ū re’are’a.
Nō te pārurura’a i te tā’āto’ara’a
‘E’iaha e haere nā rāpae. A hi’o tāmau i te mau ha’apūrorora’a a Météo France. Te nūmera rū i ni’a i te fenua, te 18 ‘e te 16 nō te mau fifi i ni’a i te moana.
