4 matahiti tō Vaihiti Paquier, 24 matahiti, ‘imira’a i te ‘ohipa i roto ‘i tōna ‘oire nō Puna’auia ‘e ‘i te matahiti mā’iri ‘ua tomo i te pū ‘ohipa nō te ha’apūai i tāna fa’aineinera’a pāpa’i parau. « Maoti te tauturu ‘a te pū ‘ohipa, ‘ua tomo vau i te matahiti i mā’iri a’e nei i roto hō’ē pū ‘e fa’aineine ra i te ta’ata nō tā rātou tau ha’apā’arira’a. I teie ‘āva’e, ‘ua roa’a tā’u parau fa’aau ‘ohipa tā’oti’a-‘ore-hia », i te reo māuruuru ‘o Vaihiti Paquier.
Mai ia Vaihiti, hō’ē ‘āhuru a’e ta’ata e fa’ari’ihia ra ‘i’ō nei i te mahana hō’ē, te fāna’o nei rātou i te tauturu nō te pāpa’i i tā rātou parau tuāorara’a ‘e te mau tau ha’apa’arira’a ‘īritihia ‘e te ‘oire e pae a’e taime i te matahiti. Hau i te 10 matahiti i te ha’amaura’ahia i te tahua mātāmua nō te ‘oire nā roto i te mana’o tauturu i tōna nūna’a ‘ia ‘imi i te ‘ohipa. I mua i te mara’ara’a o te rahira’a ta’ata, ‘ua fa’aoti ‘o Puna’auia e fa’arahi i teie piha, e 4 mātini roro uira ‘e 2 rave ‘ohipa a te ‘oire, nō te ha’amāramarama ‘e ‘āpe’e te ta’ata i roto i tā rātou mau mā’imira’a ‘aore ra mau ‘ōpuara’a ‘ohipa.« Te vāhi fifi e ‘itehia ra, tō tāua ihoa huira’atira, ‘aita ato’a tō tāua huira’atira e māramarama maita’i ra ‘e e haere i hea. Nō tō tātou ato’a paha huru… E mea ‘ōhie a’e ia fa’atupu te mau ‘oire, no te mea, te mau ‘oire e te mau tāvana tei piha’i iho i teie huira’atira. Mea ‘ōhie a’e nō te huira’atira ‘ia haere mai i te ‘oire ‘e nā te ‘oire ‘e ‘imi atu te rāve’a no te arata’i atu i te reira ta’ata ‘e te reira i te pū, ‘i te pū anei e ti’a’auhia ra e te hau fenua ‘aore ra te Adie ‘aore ra te tahi mau vāhi, ‘e tae atu i te RSMA. Nō te fa’a’ōhiera’a i te ‘āpe’era’a ‘e te tauturura’a i te huira’atira », i te mau ha’apāpūra’a a Simplicio Lissant, tāvana nō Puna’auia.
I te mau matahiti ato’a hau i te hānere (100) rave ‘ohipa e ‘imihia ra e te mau taiete. Ono hānere (600) anira’a e tae mai nei i teie pū i te matahiti hō’ē.
E matara te pū ‘ohipa nō Puna’auia mai te monirē e tae atu i te mahana pae mai te hora va’u (8) i te po’ipo’i e tae atu i te hora ‘ahuru mā piti (12) i te avatea.
