Hau ‘i te 19 matahiti tō te ta’atira’a Te Mana ‘o te Moana ‘atu’atura’a ‘e pārurura’a ‘i te mau honu fanau’a ‘e te mau honu pēpē ‘i te fenua nō Moorea. ‘I teie mahana, ‘ua tāuihia tāna vahi ‘ohipara’a, ‘e tei roto ‘i te hō’ē tuha’a nō te hōtēra Intercontinetal ‘i Fa’a’a te ha’amaura’ahia. Nō te tupu maitaira’a te parau nō te utara’a ‘i teie mau honu nā ni’a ‘i te pahī, nā te fa’aterera’a nō te arutaimareva ‘i ha’apa’o mai te terera’a ‘ohipa, ‘inaha ‘e mau honu pēpē teie ‘e te mau honu fanau’a.
‘Ia tae ‘i ni’a ‘i te uāhu nō Pape’ete, tītau-atoa-hia ‘e ha’apao maita’i ‘i te pae nō te hurira’a ‘i raro, ‘ia ha’apa’o maita’i-ato’a-hia ‘i ni’a ‘i te porōmu ‘e tae atu ‘i tō rātou nohora’a ‘āpī, vāhi āteatea ‘e te nahonaho maita’i. ‘I roto ‘i teie ‘āua, hau ri’i ‘i te 10 honu fanau’a tei tu’uhia, ‘e mau honu fanau’a teie tei fa’aorahia mai ‘i ni’a ‘i te motu nō Tetiaroa.
Te nā’ō ra ‘o Hélène Duran, te fa’atere ‘o te ta’atira’a Te Mana ‘o te Moana, « ‘e mea apiapi roa te ‘āu’a’ e vai ra ‘i Mo’orea nō te fa’ari’i ‘i te huira’atira, nō reira ‘oa’oa roa mātou te noa’ara’a mai teie vāhi ‘āpī. ‘E tāmau ā mātou ‘i tā mātou ‘ohipa, ‘oia ho’i te pārurura’a ‘e te ha’amāramaramara’a ‘i te huira’atira, te faufa’a, ‘e ‘ia pāruruhia te honu. ‘I roto ‘i teie ‘āu’a te vai ra h’ō’ē ‘ūputa, ‘e fa’a’āpī noa te miti ‘e mea faufa’a roa nō te tupu-maita’i-ra’a ‘o teie mau honu ».
Hau roa atu te fa’ahiahia ‘i te hōtēra Intercontinental, ‘ua fa’anaho-ato’a-hia mai hō’ē fare pōte’e nō te fa’ariira’a ‘i te mau tamarii. ‘I raro a’e ‘i teie fare pōte’e ‘e ha’api’ihia ‘i te mau tamari’i ‘i te huru ‘e te faufa’a ‘o teie ‘ānimara te honu.
Ahuru ti’ahapa taurearea ‘e hōro’a ra ‘i tō rātou taime mā te tāmoni ‘ore nō te tauturu ‘i te ta’atira’a Te Mana ‘o te Moana. Turuhia rātou ‘e te fa’aterera’a nō te arutaimareva, ‘inaha ‘e ‘ânimara pāruruhia teie ‘i Pōrinetia ‘e ‘ati a’e ‘i te ao nei. Noa atu teie mau rāve’a parurura’a, ‘ua rau te fifi ‘e fa’aruruhia nei ‘e teie ‘ānimara, mai te mau ha’avi’ivi’ira’a ‘i roto ‘i te miti, te vai ra te honu ‘e pēpē nei ‘i te mau mātini poti, te vai ato’a ra te ta’ata ‘e tūpa’i huna nei ā ‘i teie ‘ānimara. Mai te mau taime ‘e rahi ai te mau poti fa’aori rātere ‘i ni’a ‘i te tai. Ei hiora’a, ‘i te matahiti ‘i ma’iri , ‘e 5 fanau’a honu hō’ē noa ‘āva’e tei pēpē ‘i te mātini ‘o te mau poti fa’aori rātere.
Tei pāpū ‘e ‘iriti maru-noa-hia teie pū nō te fa’ari’i ‘i te huira’atira, tae noa atu ‘i tā mau tamari’i haere ha’apiira’a.
Nō te mea ho’i, ‘e ‘ānimara pāruruhia te honu, ‘ia ‘ite noa atu ‘outou hō’ē honu fanau’a ‘aore rā te hō’ē honu ‘ua pēpē, ‘a fa’ara ‘oi’oi atu ‘i te fa’aterera’a nō te arutaimareva, ‘inaha tītauhia hō’ē taote ‘ānimara nō te hi’opo’ara’a ‘i teie honu, hou ‘oia ‘a tu’uhia atu ai ‘i roto ‘i te rima ‘o te ta’atiraa ‘e parau fa’atia tāna nō te rapa’aura’a ‘i teie honu.
‘Ei fa’ahamana’ora’a ‘ia ‘outou ‘e tō raro mata’i mai, te vai ato’a rā hō’ē pū nō te fa’ari’ira’a ‘i te mau honu pēpē ‘i te fenua nō Pōpora.