« ‘Ua pa’ari ‘ona i roto i te fa’atītī’āhemora’a motocross ! Tōna tu’ane, ‘ua haru ato’a i te ti’ara’a ‘aito i te matahiti ono ‘ahuru mā pae ra (65) ‘e va’u ‘ahuru mā pae (85). I te piti o tōna matahiti, ‘ua hina’aro ‘ona hō’ē faura’o piti huira, ‘ua ho’o mai vau i te « Piwi » ‘e ‘ua ‘ite au e mea ‘aravihi ‘ona i ni’a i te tahua, e mea nā reira māua i te ho’ora’a mai i te mau mātēria ato’a. ‘E ‘ua fa’aō i roto i te mau tata’ura’a ‘e ‘ua mātau ‘ona i te māniania ‘o te mōtō« Matairea Bessert, te metua tāne ‘o Aomana.
I teie mahana, te tata’u ra ‘oia i roto i te tuha’a va’u (8) ‘e ‘ahuru mā piti (12) matahiti. ‘E ‘oia ana’e te tamari’i e fa’ahoro ra hō’ē faura’o ‘e pae ‘ahuru (50) pua’ahorofenua te pūai. ‘Ua haru mai ‘oia i te ti’ara’a toru i roto i te tata’ura’a ‘aito nō Pōrīnetia, o tei tupu ‘i Papara: « Mea au roa nā’u te motocross, ‘e tōna māniania ato’a ‘e tae noa atu i te tere vitiviti. ‘E ‘aro ato’a vau ‘i te mau tamari’i pa’ari atu iā’u, ‘aita vau e ri’ari’a. Ia topa vau, e ti’a fa’ahou vau, nō te fa’ahope tā’u tata’ura’a » Aomana Bessert.
‘Ua ō ato’a ‘o Aomana i roto i te tata’ura’a tei tupu i te ‘āva’e ‘ātopa i ma’iri o tei tupu ‘i Taratoni, ‘ua mau atoa mai i te ti’ara’a toru (3). « Tō’u taera’a ‘i Nouméa, ‘ua au roa vau, ‘inaha ‘ua haere au i ni’a i te tahua, e mea au nā’u e ha’ape’e tā’u moto ».
Mea au ato’a nā Aomana i te tapitō peretīria, ‘ua haru ato’a mai i te ti’ara’a ‘aito nō Pōrīnetia i roto i tāna tuha’a, tū’aro teie e nehenehe e tauturu iana ‘i ni’a ‘i tōna mōtō. « Mea au roa nā’u te jiu-jitsu, rāve’a tauturu iā’u ia mau maita’i ‘i ni’a i tō’u mōtō, hau roa atu, rāve’a fa’a’ineinera’a pāpū ato’a teie no tā’u mau tata’ura’a fa’atītī’āhemora’a faura’o piti huira »
Te nā ‘ō ra te metua tāne : « ‘I roto noa i te ha’api’ira’a hō’ē tū’aro nō te pārurura’a ia ‘oe mai te taputō peretīria, ‘e tauturura’a tera ia ‘oe nō te tāpe’ara’a i te mōtō, te aura’a, ‘ia paruparu ana’e ‘oe ‘eiaha e fa’aru’e i te mōtō. ‘Ua hō’ē teie nā tū’aro e piti ».
‘Aita ‘o Aomana i fa’aea noa ‘i ni’a i te motocross ‘e te taputō peretīria, tei roto ato’a ‘ona i te tu’era’a pōpō ‘i ni’a i te one. Te aura’a,e mea fa’anaho maita’i tāna tārena tū’aro i te hepetoma. « ‘I muri noa mai i te ha’api’ira’a, ‘e ‘āfa’i vau iāna ‘i tāna taputō peretīria, muri mai e ho’i māua, ‘aore rā, e haere māua i te tu’era’a pōpō ‘i ni’a i te one. Hina’aro ‘ona e haere fa’ahou e horohoro, ‘e te toe’a o te hepetoma e ‘āfa’i vau iāna ‘i ni’a i te tahua fa’ahorora’a mōtō nō tāna fa’aineinera’a » Tevaite Vernaudon, te metua vahine ‘o Aomana.
I roto noa tau hepetoma e fāna’o ‘o Aomana i tōna faura’o motocross ‘e ono ‘ahuru mā pae (65) pua’ahorofenua i te pūai. ‘A tīa’i noa atu ai teie faura’o ‘āpī, i ni’a i te tahua nō Vaitarua ‘i Taravao ‘e te tatami, ‘oia ‘e fa’ahope ai tōna pūai, nō te fa’aineine-maita’i-ra’a iāna.